Кечээ, 5-декабрда Садыр Жапаров «Дордой» базарына барып, ызы-чуунун аркасында кимдер турарын билерин айтып, үчүнчү күчтөр тууралуу кеп кылган. Ал айтканы боюнча түшүндүрмө берди.
«Жөнөкөй соодагерлердин ичинде кыпындай да кир жок. Ал байкуштар өз проблемаларын чечип алсак болду деп митингге чыгышты. Аларды туура эле түшүнөбүз. Ал эми алардын митингге чыкканынан пайдаланып кетели деген илгерки «чоң акырдан жем жеп» жүргөндөр, бүгүн ишсиз калгандар, криминалдар бири-бирине телефон чалышып, «сен тиги базарга бар, сен бул базарга бар, элди болушунча көп чыгаргыла» деп сүйлөшкөнү бар.
Айрымдары өз адамдарын каржылап да жиберишти. Мунун баары атайын кызматтардан каттоодон өттү. Эгер атайын кызмат тергөөнүн кызыкчылыгы үчүн жашыруун эмес десе, маалымат булактарынан сөздөрүн угуп калаарсыңар. Ошол үчүн мен аларга «Үчүнчү күчтөр силерди пайдаланып кетпесин» деп айттым. Ичинде кири жок жөнөкөй соодагерлер андай күчтөр арасына кирип алып иштеп атканын кайдан билишсин. Ошол үчүн артыбызда эч ким жок деп кыйкырып атышпайбы. Туура эле түшүнсөк болот», — деди ал.