БШК 30-ноябрда өткөн Жогорку Кеңештин депутаттарын мөөнөтүнөн мурда шайлоодо добуш берүүнүн толук жыйынты 14-декабрга чейин белгилүү болору билдирди. Мыйзамга ылайык, автоматташтырылган урналардан алынган маалыматтар алдын ала болуп саналат.

Алгач участкалык шайлоо комиссиялары кол менен эсептөөнүн негизинде тиешелүү шайлоо участкасында добуш берүүнүн жыйынтыктарын чыгарышат.

Андан кийин округдук шайлоо комиссиялары участкалык шайлоо комиссияларынан келип түшкөн добуш берүүнүн натыйжалары жөнүндө протоколдордун негизинде аларда камтылган маалыматтарды жалпылайт. Таблицаны түзөт жана округ боюнча добуш берүүнүн жыйынтыктарын чыгарат.

Борбордук шайлоо комиссиясы округдук комиссиянын протоколунун негизинде округ боюнча шайлоонун натыйжаларын шайлоо күнүнөн тартып 13 календардык күндөн кечиктирбестен (14-декабрга чейин) аныктайт жана округ боюнча шайланган Жогорку Кеңештин үч депутатын аныктайт.

Борбордук шайлоо комиссиясынын чечимдери үч күндүн ичинде сотко даттанылышы мүмкүн.