Адамдын уйкусу дайыма канбаса эмне болот? Окумуштуулар «Ханна» деп аталган моделди жараткан. Алар бул модель менен адам 2050-жылга чейин системалуу түрдө жетиштүү уктабаса кандай болорун көрсөткүлөрү келген.
Уйкунун өнөкөт жетишсиздиги белдин оорушун жана булчуңдардын атрофиясын пайда кылат, анткени ткандардын калыбына келтирүүгө жооптуу гормондор бузулат. Кан айлануу да начарлап, чачтын фолликулдары жетиштүү азык ала албай, түшө баштайт. Адам таз да болуп калышы мүмкүн. Коллагендин азайышынан тери ийкемдүүлүгүн жоготот, бырыштар пайда болуп, көздүн астындагы кара так пайда болот жана картаюу тездейт.
Уйкунун жетишсиздиги дененин сырткы көрүнүшүнө жана жалпы абалына терс таасирин тийгизүүчү стресс гормонунун деңгээлин жогорулатат. Уйкунун өнөкөт жетишсиздиги буттарда суюктуктун топтолушуна жана шишикке алып келиши мүмкүн болгон жүрөк-кан тамыр ооруларынын пайда болушун жогорулатат. Мээ уйку учурунда маалыматты иштетип, сактагандыктан, эс да жабыркайт. Туура эс алуу болбосо, кыска мөөнөттүү да, узак мөөнөттүү да эс тутум начарлайт.
Уйкунун жетишсиздиги салмакка да таасирин тийгизет. Тамактанууга жооп берген лептин жана грелин гормондорунун балансы бузулат. Натыйжада адам ашыкча тамактанып, ашыкча салмакка ээ болот.
Дарыгерлер суткасына 7–9 саат уктап, дем алыш күндөрү да бир убакта турууну сунушташат.
