Британиялык-шведдик AstraZeneca компаниясы Оксфорд университети менен биргеликте иштеп чыккан коронавируска каршы AstraZeneca вакцинасынын атын Vaxzevria деп өзгөрттү. Бул тууралуу Швециянын дары-дармектерди башкаруу боюнча сайтында маалымдалды.
«Дарынын аталышын өзгөртүү башка өзгөрүүлөрдү шарттабайт. Бирок аймактардагы эмдөө адистери бул өзгөрүү жөнүндө билиши керек, анткени продукт жөнүндө маалымат, этикеткада жана таңгакта башкача көрүнүшү мүмкүн», — деп айтылат маалыматта.
Бирок коомчулук вакцинанын аталышынын өзгөртүлүшү аны менен эмделгенден кийин жарандардын өлүмгө учурашы көп катталгандыктан кийин вакцинаны колдонуудан көп өлкөлөр баш тарта баштагандарын айтышып, мындан улам вакцинаны чыгарган компания дарынын атын өзгөртүүнү чечишкенин айтышууда.
Белгилей кетсек, буга чейин Европанын бир катар өлкөлөрү эмдөөдөн кийин тромбоз оорусуна байланыштуу AstraZeneca колдонуудан убактылуу баш тартышкан. Бирок кийинчерээк дары-дармектерди иштеп чыккан Дүйнөлүк саламаттыкты сактоо уюму (ДССУ) аталган вакцинанын коопсуздугун жарыялашкан. Андан кийин кайра бир нече мамлекет аны колдоно башташкан.
