Бүгүн, 1-мартта ирандык ЖМКлар өлкөнүн жогорку лидери Али Хаменеи АКШ жана Израиль жүргүзгөн операциянын натыйжасында каза болгонун тастыкташты. Бул маалыматты Ирандын мамлекеттик Tasnim, IRNA, ISNA, Mehr жана Fars агенттиктери да ырасташты.
Өлкө өкмөтү 40 күндүк жалпы улуттук аза күтүү жана 7 күндүк жалпы улуттук эс алуу күндөрүн жарыялады. Хаменеи акыркы 36 жыл бою Ислам Республикасын жетектеп келген.
Жогорудагы маалымат ырасталганга чейин АКШнын президенти Дональд Трамп Ирандын жогорку лидери Али Хаменеи каза болгонун билдирген. Бул тууралуу ал Truth Social социалдык тармагындагы баракчасына жазды.
«Хаменеи — тарыхтагы эң жаман адамдардын бири — каза болду», — деп айтылат Трамптын билдирүүсүндө. Анын пикиринде, иран эли «өлкөсүн кайтарып алуу үчүн эң чоң мүмкүнчүлүккө» ээ болду.
«Биз алардын Ислам революциясынын сакчылар корпусунун, армиясынын жана башка коопсуздук күчтөрүнүн жана полициясынын көпчүлүгү согушууну каалабай, бизден иммунитет издеп жатканын угуп жатабыз. Кечээ кечинде айткандай: “Азыр алар иммунитет ала алышат, кийин аларды өлүм гана күтөт!”. Ислам революциясынын сакчылар корпусу менен полиция ирандык патриоттор менен тынч биригип, өлкөгө татыктуу улуулукту кайтарып берүү үчүн бир бүтүн болуп иштешет деп үмүттөнөм», — деди Трамп.
Ошондой эле Трамп Иранга каршы массалык так соккулар бир жума же «Жакынкы Чыгышта жана акырында бүткүл дүйнөдө тынчтыкка жетүү» максаты аткарылганга чейин уланарын кошумчалады.
Буга чейин Хаменеи Израилдин Тегеранга жасаган соккусунун натыйжасында каза болгону тууралуу Reuters жана Times of Israel басылмалары израилдик жогорку даражалуу аткаминерге шилтеме берип жазышкан. Иран бул маалыматтарды «психологиялык согуштун ыкмалары» деп атаган.
