Мындан бир нече күн мурун социалдык тармакта топ болгон өспүрүм балдар окуучуну сабап жаткан видео тараган. Видеонун Казакстандын Семей шаарында тартылганы маалымдалган. Соцтармак колдонуучулары ыйлап жаткан өспүрүмдү тепкилеп, үстүнө секирип, сөгүп жаткандарды таап, жазалоону талап кылышкан.
Полиция маалымат таратып, видеонун Семейде тартылганын тастыктап, кылмыш иши козголгонун билдирген. Сабалган баланын 6-класстын окуучусу экени аныкталган. Көп өтпөй эле полиция видеодогу окуучулар аныкталганын, ата-энелери менен бирге бөлүмгө жеткирилгенин билдирген. Кармалгандардын арасында бир кыз болгон. Баары полициянын каттоосуна алынган. Ал эми жабарлануучу окуучу менен психологдор иштеп баштаган.
Бул иш боюнча түзүлгөн комиссия чечим чыгарган. Текшерүүнүн жыйынтыгы боюнча, окуянын бардык катышуучуларын адистештирилген мектепке жөнөтүүнү сунуштоо чечими кабыл алынды. «Комиссия үч ата-энеге карата ата-энелик укуктан ажыратуу, ошондой эле бир өкүлгө карата эки балага камкордук кылууну токтотуу боюнча сунуш киргизди»,- деп айтылат маалыматта.
Кийин маалым болгондой, бул 3 мектептин окуучулары чогулган жерде болгон. Чуулгандуу окуядан кийин бир нече билим берүү мекемелеринин жетекчилери дисциплинардык жоопкерчиликке тартылган. «Мектептин директорунун тарбия иштери боюнча орун басарлары, класс жетекчилер жана мектеп психологдору тартиптик жоопкерчиликке тартылды», — деп айтылат маалыматта.
Семей шаарындагы №15 мектеп-интернатынын директору менен адистештирилген «Жас Улан» лицей-интернатынын директору сөгүш алган. Ал эми №9 мектептин директору кызматтан бошотулган.
Абай облустук саламаттыкты сактоо башкармалыгы маалымдагандай, 23-февралда Семей ооруканасынына жеткирилген бала дарыгерлердин кароосунан өткөн. Анын абалы учурда канааттандыраарлык. Денесинде көптөгөн жарааттар бар, өмүрүнө коркунуч жок. Ал учурда педиатр, травматолог жана невропатологдун көзөмөлүндө.
Посмотреть эту публикацию в Instagram
