Рейхан Инанды Түркиянын Кыргызстандагы элчиси Ахмет Садык Доганга каршы сотко кайрылды. Бул тууралуу адвокат Таалайгүл Токтакунова СЕРЕП МЕДИА маалымат агенттигине билдирди.
Арызда: «Буга чейин Түркиянын дипломатиялык миссиясынын башчысы Орхан Инанды ФЕТӨнүн Орто Азиядагы башчысы жана адам деп айткан»,— деп айтылат.
«Ахмет Садык Доган менин жолдошум жөнүндө жалган маалымат таратты. Алар бир гана Орхан Инандынын эмес, биздин бүт үй-бүлөбүздүн ар-намысын жана кадыр-баркына шек келтирди. Кылмыш жасаган деп айыпталган ар бир адамга сот процесси аяктаганга чейин күнөөлүү деп айтууга болбойт», — деп айтылат анда.
Рейхан Инанды Бишкек шаарынын Биринчи Май сотунан элчинин айткандарын жараксыз жана ар-намыс менен кадыр-баркка шек келтирүү деп табууну суранды.
Буга чейин Түркиянын Кыргызстандагы атайын жана ыйгарым укуктуу элчиси Ахмет Садык Доган Орхан Инандынын Кыргызстан үчүн канчалык кооптуу экендигин айтып берген.
1-июнга караган түнү «Сапат» билим берүү мекемесинин негиздөөчүлөрүнүн бири Орхан Инанды дайынсыз жоголгон. 3-июнда Коопсуздук кеңешинин катчысы Марат Иманкулов Кыргыз жараны Орхан Инандыга байланыштуу кырдаал боюнча ыкчам кеңешме да өткөргөн. Жоголгон күндөн тарта ИИМ менен УКМК аны издеп жана ал иштерден эч кандай жыйынтык майнап чыкпай жаткан. 5-июлда Түркиянын президенти Эрдоган Орхан Инандынын кармалып, Түркияга жеткирилгенин жар салды.
