Казакстан менен суу бөлүштүрүү суу топтоо графигине ылайык ишке ашырылып жатат. Бул тууралуу Айыл чарба министрлигинен билдиришти.
Аталган график жыл сайын вегетациялык мезгил башталганга чейин иштелип чыгат жана Чу-Талас суу чарба комиссиясынын тең төрагалары менен кол коюлат. Бирок бул графиктер булактын суусу аз болгон кырдаалды эске алуу менен быйыл июнь айында гана макулдашылган жана бекитилген.
«17-19-июль күндөрү Бишкек шаарында Чу жана Талас дарыялары боюнча суу бөлүштүрүү маселелерин чечүү боюнча Кыргызстан менен Казакстандын өкүлдөрүнүн жолугушуусу болуп өткөн. Казакстан тарап Жамбыл облусунун суу пайдалануучуларына сугат суу берүү боюнча Талас дарыясынын бассейниндеги суу чарба абалы оор экенин билдирип, Киров суу сактагычынан суу берүүнү 18-июлдан 31-июлга чейин 45 куб метрга көбөйтүү өтүнүчү менен кайрылган. Кол коюлган график боюнча 40 куб метр алышы керек болчу. Өз кезегинде кыргыз тарап суунун аздыгына, бизде да эгин талаалары куурап жатканын, Чүй жана Талас облустарындагы сугат суунун тартыштыгы жөнүндө жана казак тарапка 1-августка карата секундуна 45 метр куб чыгымдоодо Казакстандын үлүшү болгону 3,54 миллион метр куб экенин, ал эми секундуна 10 метр куб чыгымдоодо 4-августка карата 2023-жылдын аягына чейин түгөнөрүн маалымдады», — деп айтылат маалыматта.
Келтирилген эсептөөлөргө жана жүйөлөргө карабастан казак тарап өз өтүнүчүнөн баш тарткан жок. Ошол эле учурда кыргыз тарап суу топтоо графигин киргизүү жолу менен суу алуу лимитин үнөмдөдү, бирок Кыргызстандын фермерлери да сугат сууга абдан муктаж болушкан. Бүгүнкү күнгө чейин Талас өрөөнүнүн булактарынын суусу өтө төмөн бойдон калууда.
Жолугушуунун жыйынтыгында казак тарап Казакстандын Экология жана жаратылыш ресурстары боюнча вице-министринин жана кыргыз тарап Суу ресурстары кызматынын директорунун атынан протоколго кол коюшту, ага ылайык август айынын 2-декадасынан баштап казак тарапка суу берилбей турган болгон.
Ошол эле учурда Киров суу сактагычына келип түшүүлөр көбөйгөн шартта Казакстандын суусун топтоо карала тургандыгы айтылган. Тилекке каршы, бүгүнкү күндө суу сактагычтагы суунун агымы секундуна 1 метр куб гана түзөт, агуунун көбөйүшү байкалган жок, 2022-жылы суунун келиши секундуна 13,7 метр куб түзгөн. Казакстандын Талас каналынан мамлекеттик чек араны бойлой коллектордук-дренаждык тармак боюнча секундуна 5-8 метр куб өлчөмүндө алууга мүмкүнчүлүгү бар.
