Ак-Ордо конушунда Марал Шараболотова аттуу жаран жашаган үй соттун чечими менен бузулуп, балдары менен үйсүз калган. Президент Садыр Жапаров конушка барып, ал аял менен жолугушкан. Жолугушуудан кийин аталган жерге жаңы үй курула баштаганы белгилүү болгон.
Шараболотовага каршы соттон утуп чыккан жаран Толкун Самудинова 9-мартта АКИpress агенттигинде өткөн маалымат жыйынында президент Садыр Жапаровго кайрылуу жасады.
Анын айтымында, 2005-жылы Кыргызстандын ошол учурдагы президенти Курманбек Бакиев ар бир жарандын жер тилкеси болушу керектигин айткан. Мына ушундай арыздын негизинде Самудинова жер тилкесин берүү үчүн кезекке турган. 2007-жылы ага жер тилкесин берүү боюнча чечим чыгарылган. Самудинова 2009-жылга чейин тиешелүү шарттар болбогондуктан үй сала алышпаганын түшүндүрдү. Алар үй салуу чечимине келгенде комиссиянын өкүлдөрү келип, бул жер тилкеге курууга мүмкүн эместигин, жол салынаарын түшүндүрүшкөн.
«Сизден акыйкат чечим чыгарууңузду суранам, эгер жолугууну кааласаңыз, мен сизге барганга даярмын. Башка тарапты да уккула. Менин кызыл китебим бар. Марал Шараболотова бул жерди “Акыйкат Айым” коомдук фондунун мүчөлөрүнөн сатып алган. Ошол күнү эл чогулуп, мени ошол жерден сабап салышты. Мени атайылап жаман адам катары көрсөтүштү. Үйүмдү өрттөйбүз деп коркутушту. Мен үйүмө качып кеттим, ага карабай артымдан ээрчип жүрүштү, ал жерде 500дөй адам бар болчу. Экөөбүз бекинип отурдук, бирок үйгө бирөө кирип, милиция жолдошумду алып кетүүгө үлгүрүштү. Тез жардам чакырганга да мүмкүнчүлүгүм болгон жок, кечинде гана ооруканадан жардам сурап кайрылдым», — деди Самудинова.
Ал белгилегендей, президент Ак-Ордо конушуна барганда ооруканада жаткандыктан жолугушууга бара албай калган. «Алар менин сабалганымды, ооруканада жатканымды жакшы билишчү. Башка аргам жок, өзүм батирде. Эгер кимдир бирөө [камерага] ыйласа, ал баарын алабы? Менин үнүм бийликке жетпейт. Менин да укугум бар, мени да уккула”, — деп кошумчалады ал.