27-август күнү Бишкекте муфтияттын жаңы курулган баш кеңсесинин ачылыш аземи болуп өткөн. Ал жерге коррупция боюнча соттолгон Райымбек Матраимов да барган.
28-августта социалдык тармактарда ачылышка атактуулар да барганы, алардын Матраимов менен түшкөн сүрөтү жарыяланды. Сүрөттөн спортчу Акжол Махмудов, ырчы Омар, ТикТокчу Аргенбайды, актёр, шоумен Нурсултан Курсанали уулун, модель Аскат Осмоновду, фотограф Эржан Кадырбековду, шоумен, актер Эмил Токтошевди, блогер Байэль Байгазиевди көрүүгө болот. Жогорудагы көрүнүштү коомчулукка Мыкы аты менен таанымал шоумен Мыктыбек Мукаев соцтармактагы баракчасы аркылуу сындап өткөн.
Kaktus.media басылмасына Аргенбай саясат боюнча түшүнүгү жок экенин айткан. «Мен имарат кимдин атынан курулуп жатканын билген эмесмин. Саясат боюнча такыр түшүнүгүм жок. Мен жөн эле муфтият ачылып жатат деген ой менен баргам. Ал байкени соцтармакка киргизген эмесмин. Аягында чогуу сүрөткө түшүп койчу дегенинен түшкөм. Матраимов дегенди уккам. Азыр кичине өкүнүп калдым. Барбай эле койсом болмок экен. Болгон иш болду», — деди ал.
