Кечээ, 3-июнда Бишкек шаарынын мэри Айбек Жунушалиев, мэрдин орун басары Азамат Кадыров, башкы архитектор Урмат Карыбаев жана эл аралык «Nikken Sekkei» архитектуралык-шаар куруу компаниясынын өкүлдөрү шаарды үстүнөн кыдырды.
Бул рейс шаардын жаңы башкы планын иштеп чыгуу боюнча масштабдуу долбоорду ишке ашыруудагы алгачкы кадам болду. Шаар куруу жана урбанистика тармагында дүйнөлүк тажрыйбасы бар Nikken Sekkei шаарды өнүктүрүүнүн узак мөөнөттүү планын иштеп чыгуу үчүн аналитикалык документти иштеп чыгууга киришүүдө. Пландын негизги максаты экологиялык, социалдык жана экономикалык аспектилерди эске алуу менен борбордун туруктуу өнүгүүсү үчүн шарттарды түзүү болуп саналат.
Nikken Sekkei компаниясынын өкүлдөрү кызматташуунун ийгиликтүү болоруна ишенимин билдиришип, мындай олуттуу долбоорго катышуу алар үчүн чоң сыймык экенин белгилешти. Планды иштеп чыгууда алдыңкы дүйнөлүк тажрыйбаларды жана инновациялык чечимдерди эске алуу менен комплекстүү мамиле колдонулаарын баса белгилешти. Бишкек шаарынын башкы архитектору алдыдагы иштер шаардын учурдагы көйгөйлөрүн чечип тим болбостон, анын узак мөөнөттүү өнүгүүсүнө пайдубал түзөрүн, жашоочулардын туруктуулугуна жана ыңгайлуулугуна көңүл бурарын баса белгиледи.
