Бишкекте сасык тумоого каршы эмдөө жүрүп жатат. Бул тууралуу мэриядан билдиришти.
Борборго Орусияда чыгарылган «Гриппол плюс» сасык тумоосуна каршы 14 миң 685 доза вакцина алынды. «Бардык үй-бүлөлүк дарыгерлер борборлору тобокелге кабылган адамдарга сасык тумоого каршы эмдөө жүргүзүшөт: балдар үйлөрүнүн тарбиялануучулары, тез-тез ооруп жүргөн балдар, карылар үйлөрүнүн жана мүмкүнчүлүгү чектелген адамдар үчүн адистештирилген үйлөрдүн жашоочулары. Тез жардам бөлүмдөрүндө, төрөт үйлөрүндө, реанимация бөлүмдөрүндө, алгачкы медициналык-санитардык борборлордо, үй-бүлөлүк дарыгерлерде жана 65 жаштан ашкан кары адамдарда иштеген медицина кызматкерлери да эмдөө алышат», — деп айтылат маалыматта.
ДССУнун сунуштарына ылайык, коронавирус инфекциясына жана сасык тумоого каршы эмдөөлөрдүн аралыгы кеминде 14 күн болушу керек.