Кечээ, 5-июнда Жогорку Кеңештин депутаты Айбек Маткеримов боорун алмашырууга кезек күтүп жаткан бейтаптар тууралуу маалымат алуу үчүн Бишкек шаарында жайгашкан Кыргыз-Түрк Достук ооруканасына барды.
Ага чейин Жогорку Кеңештин Социалдык саясат боюнча комитетинин жумушчу тобу аталган ооруканада адамдын органдарын жана (же) ткандарын трансплантациялоо боюнча жасала турган операцияга карата даярдыктардын жүрүшү менен жеринде таанышып, боор алмашыруу үчүн кезекте турган бейтаптардан кабар алышкан. Бирок жумушчу топ келип текшерип кеткенден кийин боорун алмаштыруу үчүн кезекте турган бейтаптар ооруканадан чыгарылды деген маалымат чыккан. Ага ылайык, депутат ооруканага барып, аталган жагдай боюнча дарыгерлерден маалымат алды. Эл өкүлү бул жагдайга байланыштуу жарандардан көптөгөн кайрылуулар келип жатканын белгилеп, оорукчан адамдарды дарылабай туруп чыгарып салууга эмне себеп болгонун тактады.
Өз кезегинде Кыргыз-Түрк Достук ооруканасында операцияны ийгиликтүү өткөрүүгө даярдык көрүп жаткан Улуттук хирургия борборунун хирургу Адилет Кадыров айрым бейтаптардын анализдери толук бүтпөй калгандыктан гана чыгарылганын, алар учурда бейтапканада экенин маалымдады. Ошондой эле эң оор абалда турган бейтаптарга операция жасоо мерчемделип жатканын кошумчалады.
Ал эми бейтаптар боорун алмаштыруу үчүн көптөн бери кезекте тургандыктарын билдиришип, жасала турган операциялар тууралуу Саламаттыкты сактоо министрлиги кабарлаганын жана учурда кезектерин күтүп жатышкандыктарын айтышты.
Депутат алгачкы жолу Кыргызстанда жасала турган бул түрдөгү операциянын ийгиликтүү өтүшү улуттук медицинанын тарыхы үчүн чоң тажрыйба болорун белгилеп: “Бизде бөйрөк, боор ооруларына чалдыккандар өтө көп. Эгер дарыгерлердин тажрыйбасын арттырып, керектүү жабдууларды камсыздай алсак, бейтаптарды чет өлкөдө эмес, өзүбүздө дарылоого мүмкүнчүлүк түзүлөт”, – деди.
Маалым болгондой, мындан бир нече ай мурун Түркиянын Малатья шаарындагы Инөнү университетинин трансплантация борбору менен келишим түзүлүп, ал тараптан атайын дарыгерлер келип, Кыргызстанда биринчи боор операциясы жасалары айтылган. Жакынкы күндөрү дарыгерлердин келиши күтүлүүдө.
