Мамлекеттик чек аранын кыргыз-тажик тилкесиндеги такталбаган аймакка курулуш иштерин жүргүзүү аракеттерине бөгөт коюлду. Бул тууралуу УКМКнын Чек ара кызматынан билдиришти.
Маалыматка караганда, кечээ, 30-ноябрда саат болжол менен 13:00 чамасында Кыргызстан менен Тажикстандын ортосунда мурда жетишилген макулдашууларга карабастан, Баткен облусунун Лейлек районунун Майы аймагында тажик тарап бир тараптуу түрдө Сүлүктү-Пролетарск жолун демонтаждоо иштерин баштаган. Ал эми Тажикстандын жарандары чек аранын такталбаган тилкесине киришкен. Бул иштер УКМКнын чек арачылары тарабынан токтоосуз түрдө токтотулган.
Ошол эле маалда Тажикстандын 30-35тей жараны Максат-Арка унаа жолунун боюна тосмо кура башташкан. Кыргызстандын чек ара кызматынын талабы менен Тажикстандын жарандары тосмо курууну токтотушкан. Мындан тышкары, Баткен районунун Ак-Сай айыл өкмөтүнө караштуу Чек тилкесинде Баткен районунун тургундарына үй курууга даярдык иштери башталган.
Тажик жарандары жетишилген макулдашууларга каршы, Көк-Таш обсервациясынын (Кыргызстан) маңдайында жайгашкан Сомониён участкасында (Тажикстан) курулуш иштерин улантышкан. Кечээ Кыргызстан менен Тажикстандын чек ара өкүлдөрүнүн жолугушуусу болуп, анын жыйынтыгында тараптар курулуш иштерин токтотушту.
