Чүйдө келин төрөттөн кийин көз жумду. Маалыматты СЕРЕП МЕДИА маалымат агенттигине Саламаттыкты сактоо министрлигинен тастыкташты.
Маалыматка караганда, 36 жаштагы келин 10-февралда Жайыл районунун аймактык ооруканасынын төрөт үйүнө түшкөн. 11-февралда көз жарып, тилекке каршы, анын эртеси каза болгон. Ымыркайдын абалы жакшы экендиги, ал эми келин Токтогул районунан келгени маалым болду. Маркумдун сөөгү экспертизага жөнөтүлгөн.
Окуя боюнча редакцияга милициядан маалымат беришти. 11-февралда саат 18:10 чамасында Жайыл РИИБдин нөөмөт бөлүмүнө, Жайыл райондук төрөт үйүнөн 1988-жылы туулган келиндин төрөттөн кийин каза болгондугу тууралуу маалымат түшкөн. Аталган маалымат Жайыл РИИБге катталып, сотко чейинки териштирүү иштери жүргүзүлө башталган.
Териштирүү учурунда, 10-февралда Жайыл райондук төрөт үйүнө келин түшүп, саат 03:54 чамасында төрөп, төрөттөн кийин абалы начарлаганына байланыштуу операция жүргүзүлгөн. Келин операциядан кийин каза болгондугу аныкталган. Учурда соттук-укуктук экспертиза дайындалып, тийиштүү тергөө амалдары жүргүзүлүүдө.
