13-майда Узун-Кыр айыл өкмөтүнүн тургундары чегирткелердин көбөйүшү тууралуу билдирүү беришкен. Кайрылуунун негизинде, 14-май күнү эртең менен адистер окуя болгон жерге чыгып, кырдаалды баалап, дароо химиялык иштетүү жүргүзүштү. Бул тууралуу Айыл чарба министрлигинен билдиришти.
15-майга карата Чүй облусунун аймагында жалпы 1820 гектар аянтта изилдөө жүргүзүлүп, алардын ичинен 1236 гектарда чегирткелердин очогу аныкталып, 480 гектар жерге химиялык иштетүү жүргүзүлдү.
Чүй облусунун Жайыл районунда 2 трактор жана Панфилов районунда 3 трактор химиялык иштетүүлөрдү жүргүзүүдө.
«Жогоруда көрсөтүлгөн райондордон тышкары, Чүй облусунун башка райондорунда да мониторинг иштери улантылып, айыл чарба жерлеринде зыянкечтердин очогун аныктоо боюнча изилдөөлөр жүргүзүлүүдө. Бардык иш-чаралар белгиленген графикке ылайык, жергиликтүү өз алдынча башкаруу органдары менен тыгыз кызматташтыкта жүргүзүлүүдө.Аныкталган учурлар боюнча дароо жакынкы күндөрү тиешелүү химиялык иштетүүлөр башталат»,— деп айтылат маалыматта.
