Кечээ, 2-апрелде Жогорку Кеңештин депутаттары Кыйноолорду жана башка катаал, адамгерчиликсиз же кадыр-баркты басмырлаган мамиленин жана жазанын түрлөрүн алдын алуу боюнча Кыргыз Республикасынын Улуттук борборунун Координациялык кеңешинин курамын шайлоонун мыйзамдуулугун жана директорун шайлоонун легитимдүүлүгүн иликтөө боюнча Жогорку Кеңештин убактылуу комиссиясынын жыйынтыгы тууралуу маалымат угушту.
Аталган маселе боюнча убактылуу депутаттык комиссиянын төрагасы Кубанычбек Самаков маалымат берди. Анын айтымында, 3 ирет жыйын өткөрүлүп, тиешелүү документтерди иликтөөнүн жыйынтыгында Координациялык кеңештин мүчөлөрүн тандоодо жана Кыйноолордун алдын алуу боюнча улуттук борбордун директорун шайлоодо бир катар мыйзам бузуулар аныкталган.
Талкуунун жүрүшүндө депутат Гүля Кожокулова Кыйноолордун алдын алуу боюнча улуттук борбордун мурдагы директору Бактыбек Рысбековдун да маалыматын угуу зарылдыгын белгиледи. Ошондой эле легитимдүүлүгү убактылуу депутаттык комиссия тарабынан иликтенген Бакытбек Касымкулов жана Кыйноолордун алдын алуу боюнча улуттук борбордун мурдагы директору Бактыбек Рысбеков да өз пикирлерин билдиришти. Алардын айтымында, зарыл болгон бардык процедуралар сакталган. Убактылуу депутаттык комиссиянын төрагасы Кубанычбек Самаков бир нече ай бою бардык тиешелүү материалдар иликтенип, анын негизинде мыйзам бузуулар аныкталганын баса белгиледи.
Талкуунун жыйынтыгында Жогорку Кеңештин тиешелүү токтому кабыл алынды. Кыйноолордун жана башка катаал, адамгерчиликсиз же кадыр-баркты басмырлаган мамиленин жана жазанын түрлөрүн алдын алуу боюнча улуттук борбордун Координациялык кеңешинин мүчөлөрүн шайлоонун мыйзамдуулугун жана директорунун легитимдүүлүгүн иликтөө боюнча убактылуу депутаттык комиссия 30-октябрда түзүлгөн. Ага Кыргыз Республикасынын Акыйкатчысынын кайрылуусу негиз болгон.
