Жогорку Кеңештин жыйынында депутаттар Бактияр Орозовду илим, жогорку билим берүү жана инновациялар министри кызматына жана Догдуркүл Кендирбаеваны агартуу министри кызматына дайындоого макулдук берүү маселесин карашты.
Президент Садыр Жапаров сунуштаган талапкерлер менен президенттин жана Министрлер кабинетинин Жогорку Кеңештеги туруктуу өкүлү Алмасбек Абытов тааныштырды.
Депутат Жанарбек Акаев Билим берүү жана илим министрлигин экиге бөлүү туура демилге болгонун белгилеп, мектепке чейинки жана кесиптик-техникалык билим берүүгө өзгөчө көңүл бурууга чакырды. Депутат Айсулуу Мамашова мүмкүнчүлүгү чектелген балдардын билим алуу укугун камсыз кылуу зарылдыгын айтып, бул үчүн жаңы окуу программаларын иштеп чыгуу керектигин кошумчалады.
