УКМКнын төрагасы Камчыбек Ташиев социалдык тармактагы баракчасына «бир маселеге токтоло кетүүнү туура көргөнүн» айтып, пост жазды.
«2024-жыл дагы кирип келди. Биз көзүбүздү ачып-жумганча, билинбей эле кызматка келгенибизге 3 жылдан ашып кетиптир. Ушул үч жыл аралыгында президентибиз түзгөн команда кандай гана кыйынчылыктарды башыбыздан өткөзгөн жокпуз. Өтө көп тоскоолдуктарды жеңдик. Анын ичинде мен жетектеген УКМК дагы бир топ оор иштерди аягына чыгардык. Айрыкча коррупция менен криминалга каршы күрөштө өзүңүздөр билесиздер, башыбызды тобокелчиликке сайдык. Бийлик менен кримчөйрө чырмалышып кетиптир, ошол себептен батыл чечимдерди кабыл алууга аргасыз болдук. Ансыз мамлекетти оңдоо мүмкүн эмес болчу. Жыйынтыгы баарыңыздарга маалым.
Дүйнө жүзүндө канча мамлекет болсо, алардын баарында коррупция бар экендиги маалым. Айырмасы, ошол коррупциянын деңгээлинде гана. Кээ бир мамлекеттерде жемкорлук жокко эсе болсо, айрым өлкөлөрдө уюшкан коррупция бар. Демек, жемкорлук эч качан токтобойт. Андыктан, мен дагы бир жолу баса белгилеп айта кетүүм керек – коррупцияга каршы күрөш тынымсыз улантылат. Ал эми уюшкан криминалдык топту жок кылуу боюнча биздин ишибиз аягына чыгып калдык десем жанылышпаймын. Мындан ары Кыргызстанда уюшкан криминалдык топ, “мыйзамдагы ууру”, “смотрящий”, “положенец” деген түшүнүктөр болбойт. Кыргызстанда инвесторлор, бизнесмендер жана жөнөкөй калк үчүн бейиштин төрүндөй шарттар түзүлөт.
Урматтуу кыргызстандыктар! Ушунун баарына өлкө башчыбыздын эрки болбогондо — менин жалгыз күчүм жетпейт эле. Мурдакы башчылардын аттарын атабай эле коеюн. Баары эмес, бирок көпчүлүгү криминал менен коюн-колтук алышып кеткен. Криминал менен күрөш такыр болгон эмес. Тескерисинче өздөрүнө жакпаган оппозициячы саясатчыларга криминалдарды жиберип, айрымдарын өлтүртүп, колдонуп жүрүшкөн. Бул эч кимге деле жашыруун эмес. Баарыбыз эле билебиз. Булардын баары кечээ эле көз алдыбыздан өткөн окуялар. Эми мунун баары артта калды. Ошондуктан, келиңиздер, жамандыктын баарын эски жылга таштап, Жаңы жылга жалаң жакшылыктар менен кирели. Жаңы жыл сүйүктүү Кыргызстаныбыз үчүн жакшы жылдардан болсун деп Кудайдан тилейли. Ар бир үй-бүлөгө жакшылыктар кирип, жакшы жетишкендиктер болуусун тилейм! Кыргызстаныбыз тынч болсун! Жаңы жылыңыздар менен, урматтуу мекендештер!» — деп жазды ал.
Our president Sadyr Japarov! Kamchybek Tashiev! Let us always be together with our people for the development and growth of Kyrgyzstan, 👍👍👍
Президентибиз Садыр Жапаров! Камчыбек Ташиев Өлкөбүздун Өнүгүүсү үчүн ар дайым Элибиз менен бирге бир болсун 👍👍👍