«Ысык-Көл» экологиялык-экономикалык тутумун туруктуу өнүктүрүү жөнүндө» мыйзамга өзгөртүүлөрдү киргизүү жөнүндө» мыйзам долбоору экинчи окууда каралып, парламенттин агрардык саясат, суу ресурстары, экология жана регионалдык өнүктүрүү боюнча комитетинин отурумунда жактырылды.
Демилгечилер – Жогорку Кеңештин депутаттары Балбак Түлөбаев, Эльмурза Сатыбалдиев, Бактыбек Сыдыков.
Мыйзам долбоорун демилгечилердин бири, депутат Балбак Түлөбаев тааныштырды. Ал белгилегендей, жагымдуу инвестициялык маанайды түзүүнүн зарылдыгын эске алуу менен, көрсөтүлгөн мыйзам долбоорунда чет өлкөлүк жактарга рекреациялык объекттерге менчик укугун жана пайдаланууга берүү менен байланышкан түзөтүүлөрдү киргизүү сунушталууда, алар “Ысык-Көл” экологиялык-экономикалык тутумун өнүктүрүүгө, курорттук-рекреациялык аймакка жана жалпы эле республикага чет өлкөлүк инвестицияларды тартууга өбөлгө түзөт. Ошондон улам Кыргыз Республикасынын туристтик кызмат көрсөтүүлөрдүн дүйнөлүк рыногуна чыгышына жана бүтүндөй «Ысык-Көл» экологиялык-экономикалык системасынын олуттуу өнүгүшүнө шарт түзүлѳт.
Талкуу учурунда депутат Султанбай Айжигитов жаратылыш ресурстарын төмөн баалоо менен рекреациялык аймактарды чет элдиктерге берүү туура эместигин айтып, мыйзам долбооруна каршылыгын билдирди. “Мыйзам долбоорундагы рекреациялык аймактарга эмнелер кире тургандыгын тактоо киргизүү зарыл. Алардын катарындагы жер участокторун алып салуу маанилүү”, — деди депутат. Эл өкүлү Алишер Эрбаев мыйзам долбооруна чет өлкөлүк жарандарга рекреакциялык аймактардагы жер участокторунун мөөнөтү, убактылуу пайдаланууга берүү багытында сунуш бергенин белгиледи. Депутат Жаныбек Кыдыкбаев мыйзам долбоорунун маанилүүлүгүнө токтолуп, социалдык-экономикалык мүмкүнчүлүктөрүн белгиледи.
Посмотреть эту публикацию в Instagram
