Коронавирустун үчүнчү толкуну май айынын аягына, июнь айынын башына туш келет. Бул тууралуу саламаттыкты сактоо жана социалдык өнүктүрүү министри Алымкадыр Бейшеналиев «Парламентаризм сабактарынын» эфиринде билдирди.
Анын айтымында, буга COVID-19дун антителолору 8 айдан 1 жылга чейин созулгандыгы себеп. «Калктын негизги бөлүгү коронавирус менен 2020-жылдын июнь-июль айларында ооруган. Айрымдары жеңил түрүндө ооруп, антителолору аз болгон. Алар алып жүрүүчү болуп саналат жана башкаларга жугушу мүмкүн. Ушул себептен биз профилактикалык иштерди жүргүзүп жатабыз», — деди ал.
Бейшеналиевдин айтымында, бул жолу мурунку каталар кайталанбайт. Бардык ооруканаларда 2-3 айга чейин дары-дармектердин запасы бар. Мындан тышкары ал учурда коронавирустун үчүнчү толкунуна даярдыктар жүрүп жатканын кошумчалады.
