Ички иштер министринин мурдагы орун басары Курсан Асанов менен «Толубай» жабык акционердик коомунун директорлор кеңешинин мурдагы мүчөсү Алмаз Сарыбаевдин сүйлөшүүсү делген видео Фейсбук социалдык тармагына жарыяланды.
Аудио жазууда Курсан Асанов депутат Жанар Акаев жана башка саясатчылар бийликти куралдуу басып алуу боюнча сүйлөшүүлөрдү жүргүзүп жатканы жазуу түрүндө көрсөтүлгөн. Жарыяланган жаздыруунун сапаты абдан начар, айрым сөздөрдү угууга мүмкүн эмес. Курсан Асанов менен анын пикирлешинин сүйлөшүүсү титрде берилген. Сүйлөшүүдө ал депутат Жанар Акаев тууралуу сөз козгойт, ал куралдын бар-жогун сураган жана бийликти басып алууга айрым жаштардын даяр экенин айткан.
«Мен кереги жок деп жооп бердим. Ал менин Ички иштер министрлигине барарымды айтты. Мен Катаниге (Өмүрбек Суваналиев) барып эмне болгонун сурасам, ал «күздө көтөрүлүш» дейт. Мелис (Мелис Турганбаев) адаттагыдай мас келди, 20 жигит менен жүрөт», — дейт Курсан Асановго таандык делген үн видеодо. Ал эми Алмаз Сарыбаевге таандык делип жаткан үн Чалдабарда, Токмокто да балдар бар экенин айтат. Андан кийинки сөз Туйгунаалы Абдраимов менен депутат Канат Исаев жөнүндө болот.
Адвокат Таалайгүл Токтакунова ага Курсан Асанов бул жазуу фейк экенин жана ал посттун авторун кылмыш жоопкерчилигине тартууну көздөгөнүн айтканын билдирди. Бул тууралуу комментарийди 24.кг сайтына берген.
«Мен бул жазуу боюнча сүйлөштүм. Курсан Асанов бул маек чындап эле болгонун, бирок ал мурунку экенин, монтаждалганын айтты. Мен посттун авторуна каршы арыз жазууну сунуштадым. Бирок биздин сүйлөшүүдөн кийин Асанов суракка чакырылды жана биз арызды даярдап, тергөө органдарына алып барууга үлгүргөн жокпуз. Адегенде Курсан Асанов күбө катары чакырылган, ошондуктан биз аны коё берет деп ойлогонбуз. Сурактан кийин ал бийликти күч менен басып алууга шектелип кармалды», — деди адвокат.
