Биздин бул жолку каарманыбыз жалгыз бой эне. Ал шаар четиндеги ижарага алган жапыз үйдө төрт баласы менен күн кечирет. Балдарынын уулусу 13 жашта, кенжеси 11 айлык. Муздак тарткан тар бөлмөдө балдары менен күн кечирип жаткан жалгыз бой эне тагдырын баяндады.
Келин жолдошунун калпына чыдабай, үйдөн кууп чыгууга аргасыз болгонун айтат. Орусияга барып иштеп, ал жактагы жумушунан да «кайненем каза болуп калыптыр» деген калпты айтып, качып келген соң, экөөнүн мамилеси солгундаган. Уруштан улам акыры үй-бүлө бузулган.
«Улуу балам биринчи турмушумдан. Уулумду жолдошум өгөйлөп жаткандай да сезилди. Ошентип кууп чыккандан кийин телефон чалып, «сени өлтүрүп кетем, союп кетем» деп коркуткан күндөрү болду. Сөздөрүнө маани деле берген жокмун. Балдарга көрсөтпөй ыйлаган күндөрүм болот. Эки турмушумда тең жашай албадым. Кээде ойлоном. «Чыдап койсом болмок беле» дейм. Бирок чыдап жүрүп оорукчан болуп калсам, кантем?» — дейт мукактана сүйлөгөн каарманыбыз.
