Медиа Полиси Институтунун юристтери SuperTV каналынын журналисттеринин парламенттик аккредитациядан ажыратылышы боюнча комментарий беришти.
Институттун маалыматында айтылгандай, Конституциянын 4-беренесине ылайык, «Кыргызстандын мамлекеттик бийлиги мамлекеттик бийлик органдарынын жана жергиликтүү өз алдынча башкаруу органдарынын жана алардын кызмат адамдарынын өз ыйгарым укуктарын элдин кызыкчылыгында жүзөгө ашырууда ачыктык принциптерине негизделет» деп айтылат. Баш мыйзамдын 83-беренесинин 2-бөлүгүнө ылайык, эгерде каралып жаткан маселелердин мүнөзү жабык жыйналыштарды өткөрүүнү талап кылбаса, Жогорку Кеңештин жыйналыштары ачык өткөрүлөт.
«Бул нормалар ар бир жаран, анын ичинде журналисттер белгиленген эрежелерди сактоо менен Жогорку Кеңештин жыйындарына катышууга укуктуу экенин билдирет. Аккредитациядан өткөн журналисттерге парламенттин ишмердүүлүгү тууралуу коомчулукка ыкчам жана объективдүү маалымат берүүсү үчүн жагымдуу шарттар түзүлүп, иштөөгө кеңири укуктар берилет. Аларга каралып жаткан маселелердин күн тартиби боюнча алдын ала маалымат берилип, жыйындарга эркин катышууга мүмкүнчүлүк түзүлөт. Аккредитациялык күбөлүк аларга үн жазуу, видео тартуу жана жарык берүүчү жабдуулар менен Жогорку Кеңештин имаратына кирүү жана чыгуу укугун берет”, — деп айтылат юристтердин талдоосунда.
Эксперттердин, тараптардын, ошондой эле парламентте аккредиттелген жалпыга маалымдоо каражаттарынын жыйындарына катышуу укугу Жогорку Кеңештин регламентинде бекитилген.
«Медиа Полиси Институту эки күндөн бери Жогорку Кеңештин имаратында иштөөгө уруксат берилбей жаткан SuperTV каналынын журналисттеринин айланасында түзүлгөн кырдаалга өзгөчө тынчсыздануусун билдирет. Жогорку Кеңештин жооптуу адамдарынын мындай позициясы редакциянын журналисттеринин профессионалдык ишмердүүлүгүнө тоскоол болот», — деп айтылат юристтердин билдирүүсүндө.
Телеканалдын өкүлдөрүнүн айтымында, SuperTV журналисттерине Жогорку Кеңештин ишмердүүлүгүн чагылдырууга тыюу салуу боюнча оозеки буйрук Жогорку Кеңештин басма сөз кызматынын жетекчиси Эркин Каимовдон келип жатат. Ал мындай чечимди депутат Надира Нарматова менен болгон окуядан кийин, тактап айтканда, тартуу тобу парламенттин ашканасында тамак-аштын баасы тууралуу сюжет даярдап жаткандагы окуядан кийин кабыл алган. Тартуучу топтун аракети эл өкүлүнүн агрессиясын жаратып, эртеси парламенттин эшик алдында SuperTV редакциясы аккредитациядан өткөн журналисттердин тизмесинде жок болуп чыкты. Парламенттин басма сөз кызматынын жетекчиси Эркин Каимовдун бул аракеттери маалымат каражаттарынын эркиндигин камсыз кылуу кепилдиктерин одоно бузуу болуп саналат.
Институттун маалыматында телекомпаниянын журналисттери эч кандай мыйзам ченемдерин же этиканын нормаларын бузбаганы баса белгиленет. Бул маселе боюнча Жогорку Кеңештин профилдик комитетинде же комиссиясында, ошондой эле пленардык жыйында каралган эмес.
«Бул маалымат каражаттарынын аккредитациясын жокко чыгара турган бир дагы документ жок. Басма сөз кызматынын жетекчиси Эркин Каимовдун иш-аракетин кызматтык ыйгарым укуктарынан кыянаттык менен пайдалануу катары баалады. “Медиа Полиси Институту” редакциянын мыйзамдуу ишмердүүлүгүнө тоскоол болгон Жогорку Кеңештин кызмат адамдарынын аракеттерине прокуратура юридикалык баа бериши керек деп эсептейт», — деп айтылат маалыматта.
Буга чейин 11-майда Жогорку Кеңештин имаратында депутат Надира Нарматова тарабынан SuperTV телеканалынын журналистине орой мамиле кылынып, адамдык аброюна шек келтирилген. Андан сырткары, депутат тарабынан журналистке коркутуу жана физикалык басым орун алган. Ошол күндөгү окуя боюнча айтсак, журналист сюжет даярдап жатып, ашканада отурган депутаттарга сураныч иретинде кайрылган. Ал суранычына жөн гана “ооба” же “жок” деген жоопту айтуунун ордуна депутат Нарматова тарабынан журналистке жогоруда айтылган агрессивдүү аракеттер орун алган. Ал эми 18-майда SuperTV телеканалынын журналистине журналисттик милдетин аткаруу үчүн Жогорку Кеңешке кирүүгө тыюу салынган болчу.
