Иса Ахунбаев атындагы кыргыз мамлекеттик медициналык академиясынын ректорун шайлоо убактылуу токтотулду. Бул туурасында аталган окуу жайдын маалымат кызматынан кабарлашты. Билим берүү жана илим министрлигинин статс-катчысы Калысбек Шадыхановдун буйругунда ЖОЖдун ректорун шайлоо боюнча жобонун тартиби сакталбагандыгы айтылган.
Шайлоо эртең, 29-майда өтүшү керек болчу. Аталган кызматка төрт адам талапкерлигин көрсөткөн: медицина илимдеринин доктору, профессор Зиябидин Айдаров, медицина илимдеринин доктору, профессор Индира Кудайбергенова, медицина илимдеринин доктору, профессор Эркин Алымбаев, медицина илимдеринин доктору, профессор Жолдошбек Шаршенбиев.
