Мээрим Жуманазарова Баткенде Тажикстандын кол салуусунан каза болгон прапорщик Нургазы Боркошовдун кызы Мээрим менен жолукту. Бул тууралуу балбан кыз социалдык тармактагы баракчасына жазды.
«Баткендеги акыркы окуяда өз жанын аябай, эр-азаматтарыбыз кашык каны калгыча күрөштү. Аталган баатырларыбыздын бири — Нургазы Боркошов. Ал каргашалуу окуяда шейит кеткенден кийин жарык дүйнөгө келген ымыркай Мээрим атасы менен жолуга албай калды. «Атаң өлсө да, атаңды тааныгандар өлбөсүн» дейт. Мээримдин жана башка бардык кыргызстандыктардын көз карандысыз Кыргызстанда эркин жашашы үчүн баатырларыбыз шейит кетти. Дал ушундай улуу инсандын, кыргыздын улуу рухунун ээси, чыгаан баатырыбыздын сый-урматына ээ болуу мен үчүн чексиз сыймык. Анын баатыр элеси, эрдиги дагы далай муун үчүн үлгү болот. «Аккан арыктан суу агат» дегендей, Мээрим да болочоктогу кыргыздын сыймыктуу кызы, баатырларды тарбиялаган мыкты эне болот деп үмүт кылабыз. Атуулдук сезимди биринчи орунга койгон элибиздин ынтымагы күчөй берсин, дайыма тынчтык болуп, шейит кеткен баатырларыбыздын даңкы түбөлүк өчпөсүн!» — деп жазды ал.
Баткендеги Тажикстандын кол салуусунан 35 жаштагы УКМКнын Чек Ара кызматынын №2053 аскер бөлүгүнүн кызматкери, прапорщик Боркошов Нургазы Имамалиевич каза болгон. Анын досу СЕРЕП МЕДИА маалымат агенттигине досу каза болгондон кийин жубайы кыз төрөгөнүн билдирген. 20-сентябрда редакцияга маркумдун иниси агасы кызына ат да тандап кеткенин айткан. «Мээрим… Мээрим Жуманазаровадай балбан кыз болсун деп, Мээрим койдук. Кыз чоңоюп, баатыр атасы менен сыймыктанган баатыр кыз болсун», — деген ал. Маркумдун артында 2 кыз, 2 уул калды.
