Жумуртка импортуна киргизилген чектөөлөр жана бул жааттагы маселелер боюнча Айыл чарба министри Бакыт Төрөбаев соцтармактагы баракчасы аркылуу түшүндүрмө таратты.
2025-жылдын 1-майынан тарта алты айлык мөөнөткө Кыргызстанга тоок жумурткасын алып кирүүгө убактылуу тыюу салынды. Чечим азык-түлүк коопсуздугун камсыздоо жана бааларды турукташтыруу максатында Суу ресурстары, айыл чарба жана кайра иштетүү өнөр жайы министрлиги тарабынан кабыл алынды. Чектөө реимпортко, транзитке жана Евразия экономикалык биримдигинин ичиндеги ташууга тиешеси жок.
2025-жылдын 10-февралынан бери өлкөгө коңшу мамлекеттерден жумуртка алып келинген эмес. Тескерисинче, ушул жылдын январь-март айларында Кыргызстан Казакстанга 8 миллион 812 миң даанадан ашык жумуртка экспорттогон. Импорттун көлөмү 10 миллион 760 миң даанага кыскарып, экспорт 8 миллион 756 миң даанага көбөйгөн. Азыркы тапта жумуртка маселеси негизинен ички рыноктогу ири жана чакан тоок фермаларынын атаандаштыгынан улам келип чыкты. Өндүрүш көлөмүнүн өсүшү да жагдайга таасир этип жатат. Мындан тышкары, айыл жерлеринде көпчүлүк үй-бүлөлөр орточо 30-40 тоок багышат. Бул да жумуртканын ички көлөмүнүн өсүшүнө жана суроо-талаптын төмөндөшүнө алып келди.
Ушуга улай министрлик дыйкан-фермерлерге жумуртка өндүрүүнүн ордуна тоок эти багытындагы өндүрүшкө көңүл бурууну сунуштайт. Анткени жыл сайын өлкөгө 91 миң тоннадан ашуун тоок эти импорттолот. Тоок этин даярдоо жумурткага салыштырмалуу кирешелүү багыт катары каралууда. Импортко тыюу салынганы менен Кыргызстандын аймагында жумуртканы ташып сатууга эч кандай чектөө болбойт. Башкача айтканда, бир аймактан экинчисине жумуртка жеткирүүдө тоскоолдук жаралбайт.
