2021-2025-жылдарга электр жана жылуулук боюнча орто мөөнөттүү тариф саясаты бекитилди. Бүгүн, 1-октябрда Министрлер кабинетинин төрагасынын биринчи орун басары Азат Аалиев маалымат жыйынында тиешелүү чечимге Министрлер кабинетинин төрагасы Улукбек Марипов 30-сентябрда кол койгонун билдирди.
Кабыл алынган орто мөөнөттүү тариф саясатына ылайык, калк үчүн электр энергиясынын тарифи көтөрүлбөйт жана саатына 1 киловатт үчүн 77 тыйын деңгээлинде калат. Бийик тоолуу райондордо жашаган керектөөчүлөр үчүн электр энергиясын колдонуу нормасы жокко чыгарылды, башкача айтканда, саатына 1 киловатт үчүн 77 тыйын тариф чектөөсүз иштейт. Социалдык балдар мекемелери, электр транспорту, диний уюмдар үчүн өзүнчө тарифтер саатына 1 киловатт үчүн 1 сом 68 тыйын деңгээлинде белгиленет (салыктарды эске албаганда).
Тарифтердин жогорулашы төмөнкүлөргө гана таасир этет:
— насостук станциялар, аларга тариф саатына 1 киловатт үчүн 1 сом 9 тыйын (салыктарды эске албаганда) болот, 31,6 тыйынга жогорулады;
— бюджеттик, өнөр жай, айыл чарба жана башка керектөөчүлөр, аларга саатына 1 киловатт үчүн тариф 2 сом 52 тыйын (салыктарды кошпогондо), 28 тыйынга жогорулатылган;
— жогорулатуучу коэффициенттер колдонула турган коммерциялык түзүмдөрдүн (тоо-кен ишканалары, алтын казуучу компаниялар, куюу заводдору, спирт өндүрүшү, цемент заводдору) энергия сыйымдуу керектөөчүлөрү.
Кийинки жылдары тарифтер инфляциянын деңгээлин эске алуу менен өзгөртүлөт.
Каражат жабдууларды жаңыртууга, трансформатордук көмөк чордондорду орнотууга, электр линияларын курууга жана генерациялык кубаттуулукту жогорулатууга жумшалат.
2021-жылы калк үчүн жылытуу тарифи өзгөрбөйт жана 1134,76 сом/Гкал боюнча калат.
Кийинки жылытуу мезгилинен тарта калк үчүн тарифтер 7 пайыздан 10 пайызга чейин жогорулайт (орточо эсеп менен 1 бөлмөлүү батирди жылытуу үчүн төлөмдүн айырмасы айына болжол менен 82 сомду түзөт же жылытуу мезгилине 410 сомду түзөт).
2021-жылы калк үчүн ысык сууга болгон тарифтер дагы өзгөрүүсүз калат жана 981,76 сом / Гкал түзөт.
Келерки жылдан тарта калк үчүн ысык сууга болгон тарифтердин көтөрүлүшү 14 пайызды түзөт. Орто эсеп менен бир кишиге ысык суу үчүн төлөмдүн айырмасы айына 34,5 сом/метр куб түзөт. Бул бир нече жыл ичинде ысык суу менен камсыздоонун наркынын деңгээлине жетүүгө мүмкүндүк берет, бул жылуулук түйүндөрүн алмаштырууну жана реконструкциялоону, жылуулук пункттарын модернизациялоону, жаңы абоненттерди кошууну камсыздайт.
