«Оозуна марля тыгылып, киндиги да кесиле элек экен», — дейт таштандыдан ымыркай таап алган окуучунун бири. SEREPTV телеканалына окуянын кандай болгонун Турдубек Кошбаев айтып берди.
Ымыркай кыймылдабай бүрүшүп, тоңуп калганын айткан окуучу селсаяктарга кайрылып, баштыкты алдыртканын кошумчалады. «Үндү укканда балким жаман нерседир деп ойлодук. Анан колубуз араң жетти. Баштык кан, кыпкызыл. Анан корктук, чочуп, кайра таштадык. Эки селсаяк өтүп баратыптыр, кайрылсак бири качып кетти. Экинчиси алып берди. Ар жакта эски кийимдер жатыптыр, ага ороп бул жердеги күл ысык экен, анын үстүнө койдук. Ушул суукта жылаңач бала тоңуп өлүп калышы мүмкүн эле да», — дейт Кошбаев.
Окуучулар нес абалында милицияны башка дарекке чакырып алышкан. Анан Турдубектин досу, экинчи окуучу Байыш Алтынбаев жакын жердеги милиция бөлүмүн көздөй чуркаган. Аңгыча эл чогулуп калган. Милиция ылдый жактагы үйгө келгенин байкаган Турдубек баланы элге табыштап, аларга чуркап, Тез жардам менен милицияны баштап келген.
«Биз байкабай калсак, бул жердеги иттер кол салмак беле? Анткени биз аларды айдап алыстатып жаттык. Таштандыдан табылган балдарды жаңылыктардан гана укчубуз», — дейт Турдубек.
