Чет ѳлкѳлѳрдѳ жүргөн кыргызстандыктарга маалымдоо үчүн мобилдик топтор иштей баштады. Бул тууралуу БШКдан билдиришти.
Маалыматка караганда, Шайлоо жана референдум өткөрүү боюнча борбордук комиссиясынын мүчөлөрү Санкт-Петербургдагы жана Ленинград облусундагы мекендештердин коомдук бирикмелеринин өкүлдөрү менен жолугушту. Жолугушуу БШК тарабынан мобилдик топтордун иштеринин алкагында уюштурулган. Санкт-Петербургда жана Ленинград облусунда жашаган мекендештерге 28-ноябрдагы Жогорку Кеңешинин депутаттарын шайлоонун өзгөчөлүктөрү жөнүндө кеңири айтып, аларды кызыктырган суроолорго жооп беришти.
21-сентябрдан тартып мобилдик топтор Орусия Федерациясында иштей баштаган. Москвада жана Санкт-Петербургда жолугушуулар болуп өттү. 28-сентябрдан тартып 15-октябрга чейин Тюмень, Томск, Хабаровск, Казань, Самара, Краснодар шаарларында жолугушуулар мерчемделүүдө.
23-сентябрдан тартып 28-сентябрга чейин Италияда – Рим жана Кальяри шаарларында, 1-октябрдан тартып 10-октябрга чейин Түркиянын Стамбул жана Анталья шаарларында жолугушуулар өтөт. Жакын арада АКШнын Нью-Йорк жана Чикаго шаарларында дагы ошондой жолугушуулар өткөрүлөт.
