Президент Садыр Жапаров бүгүн, 13-августта Бишкек шаарындагы Жылуулук электр борбору экинин абалы менен таанышты. Бул тууралуу президенттик аппараттан билдиришти.
Мамлекет башчысына ЖЭБ-2нин долбоору 1991-жылы иштелип чыккандыгы боюнча маалымат берилген. Долбоор боюнча негизги отун катары экологиялык таза отунду — жаратылыш газын колдонуу пландаштырылган. Бишкек шаарындагы ЖЭБ-2ни 100 гектардан ашык жерге 2 этап менен куруу мерчемделген. Бирок СССР кулап, газ менен жабдуу үзгүлтүккө учурагандан кийин объектинин курулушу токтоп, 47 гектар аянттагы ЖЭБ-2нин санитардык зонасына акырындык менен жеке турак үйлөр курулуп кеткен.
ЖЭБ-2нин курулушун кайра жандандыруу, 2-5 жылдын ичинде куруп бүткөрүү менен анын кубаттуулугун 460 МВтка жеткирүү сунушталып жатканы белгиленди. Келечекте кошумча кубаттуулук Бишкек шаарынын тынымсыз өсүп жаткан жаңы абоненттерин электр энергиясы менен үзгүлтүксүз камсыздоого мүмкүндүк берет. Алдыда ЖЭБ-2нин жардамы менен калкты жана экономика тармактарын ишенимдүү электр энергиясы жана жылуулук менен камсыз кылуу Токтогул ГЭСиндеги электр энергиясын өндүрүү жана суу ресурстарын сарамжалдуу пайдалануу түзүмүн диверсификациялоого мүмкүндүк берет.
Жакын арада ЖЭБ-2ни реабилитациялоо боюнча болжолдуу техникалык-экономикалык негиздемени иштеп чыгууга тендер жарыялоо пландалууда.
Садыр Жапаров ЖЭБ-2нин имараты менен жабдууларын көрүп чыгып, бул стратегиялык объектинин айланасындагы калктуу конуштун тургундары менен баарлашты.
Мамлекет башчысы тургундарга ЖЭБ-2нин курулушун аяктоо ниети, таза парламенттик шайлоону өткөрүү боюнча пландаштырылган чаралар жөнүндө айтып, жарандарды коронавирус инфекциясына каршы эмдөөдөн активдүү өтүүгө чакырды. Баарлашууда жергиликтүү тургундар ЖЭБ-2нин айланасындагы участокторду трансформациялоо, социалдык объектилердин куруу жана башка курч көйгөйлөр тууралуу суроолорун беришти.
