Президенттин маалымат кызматынын жетекчиси Дайырбек Орунбековдун тегерегиндеги ызы-чуу анын Баткендин айрым тургундарына карата айткан сөзүнөн улам күч алууда. Жогорку Кеңештин мурдагы юристи Таттуубүбү Эргешбаевага удаа эле Тажикстан менен чектеш Ак-Сай айылынын тургундары анын кызматтан кетишин талап кылышты.
Дайырбек Орунбеков президент Садыр Жапаровдун маалыматтык саясат кызматын жетектеп келе жатканына туура бир жыл болду. 24.kg ал эмнеси менен белгилүү экенин жазып чыкты.
Дайырбек Орунбеков биринчи жолу Атамбаевдин тушунда белгилүү болгон. Ал кыргыз тилдүү maalymat.kg сайтынын редактору болгон (сайт азыр жабылган). Айрым маалыматтарга караганда, аны Орунбековдун өкүл атасы Мелис Мырзакматов каржылаган. Бирок Орунбековдун өзү да, Оштун экс-мэри да бул маалыматты тастыктаган эмес.
2014-жылы Алмазбек Атамбаев Башкы прокуратура аркылуу Дайырбек Орунбековду жоопкерчиликке тартууну талап кылган. Буга “Маалымат” сайтында 2010-жылдын июнь айындагы улуттар аралык жаңжал үчүн Атамбаевди жана башка саясатчылар күнөөлөнгөн макала себеп болгон.
Башкы прокурор Аида Салянова президенттин ар-намысын жана кадыр-баркын коргоп сотко кайрылса, сот Орунбековду 2 миллион сомго доого жыккан. Анын мындай акчасы жок болгондуктан, Орунбековдун коомдук жактоочусу Адил Турдукулов акча чогултуу акциясын жарыялап, акция «Сөз эркиндиги үчүн бир сом» деп аталган. 2017-жылы Орунбековго мунапыс жарыяланган.
Сооронбай Жээнбеков президент болуп шайлангандан кийин Дайырбек Орунбеков активист болуп, саясий туткундарды коргоп чыгып, ошол эле учурда мамлекеттик кызматка орношууга аракет кылган. Ал 2018-жылы ишке ашкан. Ал эмгек жана социалдык өнүктүрүү министри Улугбек Кочкоровдун кеңешчиси болгон. «Мен журналистиканы таштадым. Мамлекеттик кызматта иштеп көргүм келет. Мен бул жаатта пайдалуу боло алам деп ишенем”, — деген ошол кезде Дайырбек Орунбеков.
Бирок 2020-жылы журналисттик иликтөөлөрдүн аркасында Дайырбек Орунбеков саясатчыларга социалдык тармактарда «маалыматтык колдоо» көрсөтүп жатканы белгилүү болгон. Тактап айтканда, экс-бажы кызматкери Райымбек Матраимовго жардам берген. Орунбеков фейк менен байланышы бар экенин четке каккан. Бирок ал журналисттерге пандемия маалында Матраимовдордун үй-бүлөсүндө иштеп, гуманитардык жардам таратканын тастыктаган.
2020-жылдагы парламенттик шайлоодо Дайырбек Орунбеков ачык эле бийликчил “Биримдик” партиясында иштегени менен “Мекеним Кыргызстанга” да жардам берген. Ошол шайлоонун жыйынтыгы Сооронбай Жээнбековдун мөөнөтүнөн мурда кызматтан кетиши жана Садыр Жапаровдун бийликке келиши менен аяктаган 2020-жылдын октябрь окуясына себеп болгон.
2021-жылдын февраль айында Дайырбек Орунбеков коррупцияга айыпталып, кийин соттолгон Райымбек Матраимовду колдоо митингинде байкалган. Ал бул окуядан кийин Кытайдан келген товарлардын баасы кымбаттап кеткенин айтып, бажыдагы коррупция жана аткезчилик тууралуу жазган иликтөөчү журналисттерди сынга алган.
Ал эми ошол эле жылдын июнь айында Кумтөр иши боюнча кармалган депутат Асылбек Жээнбековду колдоо митингине катышып, социалдык тармактарда чагылдырган. Ал эми кийинчерээк социалдык тармактарда Сооронбай Жээнбековду колдоо акциясын баштаган.
2021-жылдын ноябрында Орунбеков парламентке өтүүгө аракет кылган – ал № 11 Алай шайлоо округу боюнча 7-чакырылыштагы Жогорку Кеңештин депутаттыгына ат салышкан. Бирок 14,86 пайыз добуш алып, өтпөй калган. Ал «Кыргыз темир жолу» мамлекеттик ишканасынын коомчулук менен байланыш бөлүмүнүн башчысы кызматына барган. Ал жерде алты айга жакын иштеп, 2022-жылдын августунда президент Садыр Жапаров аны президенттик аппараттын маалыматтык саясат кызматынын жетекчиси кылып дайындаган.
2023-жылдын май айында Дайырбек Орунбеков кыргызстандык журналисттерди туристтик сезон алдында терс кабарларды жазбоого чакырган.
Checkit Media платформасы «Президентке жасалма колдоо керекпи?» деген иликтөөнү жарыялады. Материалда анонимдүү булактарга шилтеме берүү менен өлкөнүн башкы телеканалы болгон УТРКда фейк-фабрика бар экени, ошондой эле телерадиокорпорациянын кызматкерлери Дайырбек Орунбековдон көрсөтмө алган фейк аккаунттар менен байланышы тууралуу айтылат. Алар ошондой эле оппозицияны, бейөкмөт уюмдарды жана көз карандысыз маалымат каражаттарын сындашат. Орунбеков бул иликтөөнү жалаа деп атап, журналисттердин анонимдүү булакка шилтеме жасап жатканы «ишенимдүү эмес» деп белгиледи.
