Бүгүн, 7-майда Бишкек шаарынын Октябрь райондук соту «Кумтөр Голд Компани» компаниясынан мамлекеттин пайдасына 261 миллиард 719 миллион 674 миң 80 сом өндүргөн чечим чыгарды. Ошондой эле аталган компаниядан 1 миллиард 308 миллион 653 миң 370 сом мамлекеттик пошлина төлөтүү тууралуу да жазылат. Мындай чечим соцтармакка жайылып кеткен соттун чечиминде айтылат.
Айбек Сарыбаев, Нарис Калчаев, Аблас Жээнбеков жана Кемелбек Кутманов “Кумтөр голд компани” ишканасынын үстүнөн сотко арыз жазган. Активисттер ишкананын Кумтөр кенин иштетүүдө Давыдов, Лысый мөңгүлөрүнө калдыктарды топтогонун мыйзамсыз деп таанып, мамлекеттин пайдасына кенемте өндүрүп берүүнү суранышкан. Райондук сот калдык топтоочу жайды мыйзамсыз деп тапкан.
Мамлекеттин пайдасына өндүрүлсүн деп чечим чыгарылган сумма азыркы курс боюнча 3 миллиард 86 миллион 450 миң доллардын тегерегин түзөт.
Кечээ, 6-майда Жогорку Кеңеш Кумтөргө сырттан башкаруу киргизүүгө жол ачкан мыйзам долбоорун кабыл алган эле.
