15-январда Жогорку Кеңештин Социалдык саясат боюнча комитетинин жыйынында депутат Максатбек Сарбагышев тиш дарылатып, чарчап калган 3 жашар кыздын окуясы боюнча маселе көтөрдү. Депутат «диагноз койгон жана багыттама берген дарыгерлер эмне үчүн жоопко тартылган жок?» деген суроо салды.

«Анестезиолог өз ишин дарыгердин көрсөтмөсү боюнча аткарат», — деди депутат.

Саламаттыкты сактоо министринин кеңешчиси Ренат Мавланбай уулунун айтымында, наркоз дарыгердин сунушу менен берилген, бирок анестезиолог иши үчүн кармалып жатат. «Укук коргоо органдары иликтөө жүргүзүп, дарыгерлерди жоопко тартат деп ишенебиз», — деп жооп берди ал.

Милицияга жаран арызы менен кайрылып, Ахунбаев атындагы КММАнын алдындагы бөлүмдөрдүн биринин медицина кызматкерлерине чара көрүү өтүнүчү менен кайрылган. Себеби, 18-декабрда өзүнүн кесиптик милдеттерин туура эмес аткаргандыгына байланыштуу 2020-жылы туулган небереси чарчап калганын билдирген. Аталган факты боюнча Кылмыш-жаза кодексинин 146-беренесине (Медициналык же фармацевттик кызматкер тарабынан кесиптик милдеттерди талаптагыдай эмес аткаруу) ылайык кылмыш иши козголуп, бардык керектүү экспертизалар дайындалган.
Экспертизанын жыйынтыгында «баланын өлүмүнө дары-дармектерди колдонуудан улам келип чыккан анафилактикалык шок» себеп болгон. Октябрь РИИБдин тергөө жана ыкчам-издөө иш-чараларынын жүрүшүндө 1992-жылы туулган жаран аныкталып, кармалган.
Тиш дарылатып, чарчап калган 3 жашар кыздын жакындары чогулуп, акыйкаттык издей турганын билдиришкен. Кыздын чоң энеси анестезиолог эле эмес, тиш доктур да кармалышы керектигин айтты.