«Жеке эле ИИМ эмес, ата-энелер, баарыбыз күрөшүшүбүз керек» деди Жогорку Кеңештин төрагасы Нурланбек Тургунбек уулу депутат Айсулуу Мамашевага жооп берип.
«ИИМ иштебей жатат, милиция коргобой жатат» деген бир жактуу ойдон алыс болушубуз керек. Бүгүнкү күндө ИИМ мурдагыга караганда бир кыйла жакшы. Заманбап жабдыктар бар, камера бар, иштеп жатат. Терс баа берген туура эмес. Милиция иштеп жаткандыктан кылмыш азайып жатат. ИИМ мындан дагы жакшы иш алып барышы керек»,- деди төрага.
Бүгүн, 19-июндагы Жогорку Кеңештин жыйынында депутат Айсулуу Мамашева өлкөдө балдарга карата зордук-зомбулук күчөп жатканын айтып, ИИМ башчысына кайрылган.
«Маевканын 3 мектеп окуучусу 1-класста окуган баланы 5 жолу зордуктаптыр. Ушуну бүгүнкү күнгө чейин Биринчи Май РИИБ карабай жатыптыр. Ошол эле учурда бир айым унаа айдаганды үйрөнөм деп кызды тепселеп кетиптир. Кичинекей кыз өлүп калды. Дагы бир нече окуя болуп жатат. ИИМге барса ишти толук алып барбай жатат. Тааныштары чыгып калып, актап да жатышыптыр
Маевкадагы окуяда видео далил турса да балдарды коё берип салышыптыр. ИИМ жакшы жумуш алып баргылачы»,— деген депутат.
