Президент Садыр Жапаровдун тапшырмасына ылайык келерки жылдын жазында Баткен облусунун Зардалы айылына баруучу жолдун курулушу башталат. Бул тууралуу өлкө башчысынын басма сөз катчысы Аскат Алагозов соцтармактагы баракчасына жарыялады.
Зардалы — Баткен облусунун бийик тоолуу, жетүүгө кыйын зонадагы айылы. Учурда алыскы айылга алып барчу жол жыл сайын май-июнда ачылып, кыш түшкөндө жүрүүгө мүмкүн болбой калат. Мамлекет башчысы Зардалыга 29-сентябрда барып, айыл тургундарынан кабар алган. Жолугушууда жергиликтүү тургундар орчундуу көйгөй катары унаа жолун жасап берүү өтүнүчүн айтышкан. Президент Садыр Жапаров Зардалыга бара турган жолдун салынышы 2025-жылы жазында башталарын билдирген.
