18-июль күнү Тору-Айгыр жана Чырпыкты айылдарынын ортосунда көлгө чөгүп кеткен 4 жаштагы кызды 3 тараптан издөө жүргүзүлүүдө. Бул тууралуу ӨКМ маалымдады.
— Бүгүн, 4 жаштагы кыздын изделип жатканына 11 күн болду. Тилекке каршы, издөө ишинен натыйжа боло элек. Бүгүн эртең менен саат 08:00 тарта наристени издөө иши башталып, анда Өзгөчө кырдаалдар министрлигинин куткаруучулары 3 топко бөлүнүштү.
Биринчи топто Балыкчы шаарынын өзгөчө кырдаалдар бөлүмүнөн 4 куткаруучу тартылып, Тоң районунун Шор-Булак айылынан Балыкчы шаарына чейинки аралыкта издөө иштерин жүргүзүүдө.
Экинчи топко Тоң райондук өзгөчө кырдаалдар бөлүмүнөн 4 куткаруучу тартылып, райондун Шор-Булак айылынан Бөкөнбаев айылына чейинки аралыкты карашууда.
Үчүнчү багытта Ысык-Көл райондук ӨКБнөн 2 куткаруучу тартылып, Чолпон-Ата шаарынан Тору-Айгыр айылына чейинки аралыкта издөө иштерин жүргүзүп жаткан учур.
Жалпы 10 куткаруучу, 2 АСМ автоунаасы жана 3 моторлуу кайык менен издөө иштери уланууда.
Учурда кыздын ата-энеси, туугандары социалдык тармактар аркылуу дрон жана башка керектүү шаймандары бар ыктыярчыларды наристени издөөгө көмөк көрсөтүүгө чакырууда.
Эскерте кетсек, окуя 18-июль күнү Ысык-Көл районунуна караштуу Тору-Айгыр жана Чырпыкты айылдарынын ортосунда орун алып, анда көлдө түшүп жүргөн желим баллондо отурган 4 жаштагы наристени ата-энесинин көз алдында эле көлдүн толкуну алып кеткен. Белгилей кетсек көлдүн бул жээгиндеги тилкесине эл түшпөйт.
