Буга чейин социалдык тармактарда 20 жылдыкка барган аялды кызганычтан жолдошу атып өлтүргөнү тууралуу маалымат тараган. Окуя боюнча Ош облустук милициясы маалымат таратып, 26-май күнү Өзгөн райондук ички иштер бөлүмүнө Кара-Кулжа районунун 1987-жылы туулган тургуну денесинен алган жараатынан улам ооруканага жетпей каза болгондугу тууралуу маалымат түшкөнүн, факты каттоого алынып, аймактык караштуулугу боюнча Кара-Кулжа РИИБге жөнөтүлгөнүн билдиришкен.
Окуя боюнча адам өлтүрүү беренеси менен кылмыш иши козголуп, кылмышка шектүү катары маркумдун 1985-жылы туулган жолдошу кармалган.
Ошондой эле милиция кайрадан маалымат таратып, Кара-Кулжа районунда болгон адам өлтүрүү фактысы боюнча күйөөсү аялын атка сүйрөтүп өлтүрдү деген жана башка эле адамдардын ыйлап жаткан видеосу менен чындыкка дал келбеген маалымат тарап жатканын билдирди. Алдын ала тергөө кызматынын берген маалыматы боюнча, маркумдун ок атуучу куралдын огунан алган жарааттан көз жумган.
СЕРЕП МЕДИА маалымат агенттиги атын атагысы келбеген айылдашы жана тууганы менен байланышып, айрым жагдайларды уктук. Экөө тең маркум келин 20 жылдыкка арналган иш-чарага жолдошу менен барганын айтты.
«Каза болгон аял Өзгөн районундагы Алга айылынан болот. 5 баласы бар. 3 уул, 2 кыз. 20 жылдык аземи бүткөндөн кийин жолдошу менен кеткен экен. Ал эми классташтар иш-чарадан кийин дасторкон жайып, отурушмак экен. Калганын так билбейм. Каза болгонун уктук»,- деди айылдашы.
«Жолдошу алып барып, линейка бүткөн соң алып кетиптир. Каргашалуу окуя ошол күнү эле болгон дешти. Мен өз көзүм менен көргөн жокмун, бир нерсе деп айтыш кыйын. 5 баласы бар. Улуулары катары менен 3 уул. Эки кичинеси кыз. Эң кичүү кызы 4 жашта. Буга чейин үй-бүлөдө уруш-талаш болуптур деп деле укчу эмеспиз. 27-майда жерге берилди»,- деди тууганы.
