Баткенде карызын кайтарып бере албаган жигит «амалкөйлүк» кылып кармалды. Бул тууралуу Баткен ОИИБден билдиришти.
17-апрель күнү саат 01:30 чамасында бейтааныш эки адам Кадамжай районунун Үч-Коргон айыл аймагынын Кара-Жыгач айылынын 25 жаштагы тургунун бычактап, 25 миң АКШ долларын тартып алышкандыгы жана жабырланган жаран Кызыл-Кыя шаардык ооруканасына түшкөндүгү тууралуу маалымат түшкөн. Бул маалыматтын негизинде Кадамжай РИИБи тарабынан текшерүү иштери жүргүзүлгөн.
Текшерүү учурунда, 25 жаштагы жигит Кадамжай районунун Исхак-Полотхан айыл аймагынын тургунунан 865 миң сом карыз алганы аныкталган. Бул акчаны ээси талап кылып сураганда жигит өзүнүн алдамчылык пландарын ишке ашыруу максатында, кара баштыкка вафли салып, аны сыртынан караганда акчадай көрүнсүн деп жасалмалуу аракет көргөн. Ал баштыкты “доллар” деп ойлотуу үчүн Кызыл-Кыя шаарынын өткөрмө постуна келип, ошол жердеги акча алмаштыруучу жайлардан сомдун долларга болгон курсун сурап, алдамчы көрүнүштү ишке ашырууга аракет кылган. Бирок акча алмаштырбай, из калтырбоо үчүн баштыкты көтөрүп, унаа жол менен бир нече жүз метр жөө басып барып, жасалма окуяны жаратуу максатында өзүнө өзү бычак менен жаракат келтирген. Андан соң «103» кызматына чалып, бейтааныш адамдар аны бычактап, 25 миң долларын тартып алышканы тууралуу маалымат берген.
Учурда бул факты боюнча тиешелүү тергөө иштери жүргүзүлүп, жигиттин аракеттерине укуктук баа берилүүдө.
