6-августта Аламүдүн райондук мамлекеттик администрациясынын кайрылуусунун негизинде Аламүдүн райондук ички иштер бөлүмү тарабынан жер тилкелерин өз алдынча басып алуу жана мыйзамсыз курулуш фактылары боюнча текшерүү иштери башталган.
Мыйзам бузуу учурларын аныктоо жана токтотуу максатында түзүлгөн мекемелер аралык комиссия Сыдыков атындагы айыл аймагынын аймагында, тактап айтканда №578, 569, 569*, 580, 580* контурларында текшерүү жүргүзгөн. Натыйжада айыл чарба багытындагы жерлерде — айдоо жана жайыттарда — турак жай объектилерин өз алдынча куруу, пайдубал коюу жана курулушу бүтпөгөн объектилерди салуу учурлары көп санда кездешкени аныкталган.
Бул факты боюнча Кылмыш-жаза кодексинин 212-беренеси (жер тилкесин өз алдынча басып алуу жана жердин максаттуу багытын бузуу менен мыйзамсыз курулуш жүргүзүү) боюнча кылмыш иши козголгон. Тергөө иштеринин жүрүшүндө айрым айылдык кеңештин депутаттары жана жергиликтүү аткаминерлер акча үчүн жер тилкелерин мыйзамсыз бөлүштүрүүгө катышы бар экени аныкталган. Ошондой эле документтерди жасалмалоо, курулушка уруксаттарды мыйзамсыз берүү жана пара талап кылуу фактылары да тастыкталган.
Жүргүзүлгөн ыкчам-иликтөө иштеринин жыйынтыгында Чүй облустук ички иштер башкы башкармалыгы жана Чүй облусу боюнча УКМКнын кызматкерлери кылмышка тиешеси бар деген шек менен эки адамды — учурдагы жана мурунку жергиликтүү бийлик өкүлдөрү Ш.И. (1966-жылы туулган) жана А.М. (1987-жылы туулган) — кармашты. Алар убактылуу кармоочу жайга киргизилди. Иш иликтенип жатат, мыйзамсыз аракеттерге тиешеси бар башка адамдар да аныкталууда.
Министрлер Кабинетинин 2022-жылдын 31-майындагы токтомуна ылайык, айыл чарба багытындагы жерлерге курулуш жүргүзүүгө тыюу салынат. Чүй облустук ички иштер башкы башкармалыгы жарандарды мыйзамды сактоого чакырат жана эскертет: жер тилкелерин мыйзамсыз бөлүштүрүү, куруу жана сатуу үчүн кылмыш жоопкерчилиги каралган.
