Мурда соттолгон жаран унаа урдоого шектелип кармалды. Бул тууралуу Баткен ОИИБден билдиришти.
Кызыл-Кыя шаарынын 30 жаштагы тургуну 30-март күнү таңга маал короосундо токтотуп койгон Лексус 330 маркасындагы унаасын белгисиз жаран айдап качып кеткендигин билдирип милицияга арыз менен кайрылган. Бул факты Кызыл-Кыя ШИИБге Кылмыш жаза кодексинин 211-беренеси (автомототранспорт каражаттарын айдап качуу) менен катталып, сотко чейинки өндүрүш иши башталат.
Кызыл-Кыя ШИИБдин кызматкерлери тарабынан ыкчам иликтөө иш-чараларынын жүрүшүндө, уурдалган унаа 31-март күнү Ноокат районунун Көк-Жар айылынын талаасынан табылып, унааны таштап изин жашырып кеткен жаранды аныктоо боюнча ыкчам иликтөө иштери жүргүзүлө баштайт.
Кызыл-Кыя ШИИБдин кылмыш иликтөө бөлүмүнүн ыкчам кызматкерлери тарабынан Бишкек шаарынын 18 жаштагы мурда соттолгон тургуну Кызыл-Кыя шаарынан аныкталып, кармалып, убактылуу кармоо жайына киргизилди. Учурда тергөө иштери жүрүп жатат.