«Мүчүлүштүк (сбой) — бул система таптакыр иштебей калган учурда колдонулуучу түшүнүк. Бизде мындай көрүнүш болгон жок. Жоопкерчилик менен билдирем: бир да шайлоо участокторунда мүчүлүштүктөр болгон жок», — деп баса белгиледи Тынчтыкбек Шайназаров.
Эскерте кетсек, буга чейин соцтармактарда айрым шайлоо участокторунда АСУнун ишинде мүчүлүштүктөр болгон деген маалыматтар тараган.
БШК төрагасы бул технология Кыргызстанда биринчи жолу колдонулуп жаткандыгын, дүйнөнүн эч бир өлкөдө окшош аналогдор жок экендигин эске салды. Ошондуктан, айрым учурларда жаралган суроолор адамдык факторго байланыштуу болуп, ал оперативдүү түрдө жоюлат деп билдирди.
«Ар бир участокто, чет өлкөлөрдөгү участоктордо да, АСУ, УИП, смарт-батареялар, модемдер жана башка техникалык каражаттар боюнча жетиштүү жабдыктар каралган», — деди Шайназаров.
АСУнун иши боюнча айрым учурларды түшүндүрүп жатып, Т.Шайназаров шайлоочулар бюллетенди бүктөп койгону үчүн аппарат аны кабыл албай калганын мисал келтирди.
БШК шайлоочуларды бюллетенди бүктөбөөгө чакырат. Анткени АСУ бюллетендеги маалыматтарды, талапкерлердин аты-жөнүн так жана туура окушу керек. Мындан сырткары бюллетень бүктөлбөгөн болушу зарыл, урнага бюллетендин бетин каратып салынышы керек.
БШК добуш берүү тартибин сактоого, АСУ шайлоо техникасын туура пайдаланууга чакырат.
