Австриянын Грац шаарындагы гимназияга кол салып, 10 адамды атып салган 21 жаштагы жигиттин үйүн тинтүү учурунда өлүм алдындагы кат табылганын Kronen Zeitung жазды.
Катта ал өзүн моббингдин (бир топ адамдар тарабынан жеке адамга психологиялык зомбулук көрсөтүүнүн бир түрү) курмандыгы катары сезгенин жазган. Полиция азырынча катта эмне жазылганын толук айта элек.
Кечээ, 10-июнда Австриянын Грац шаарындагы гимназияда ок атышуу болгон. Шейшемби күнү кечинде 11 адамдын, анын ичинде мектеп ажатканасында өз жанын кыйган шектүү Артурдун өмүрүн алган трагедияга байланыштуу Грац шаарындагы бардык маданий жана майрамдык иш-чаралар, ошондой эле саясий партиялардын съезддери кийинки үч күнгө токтотулду. Өлкөдө үч күндүк аза күтүү жарыяланды.
