Украинадагы согушка байланыштуу Москвага карата жаңы чектөөлөр пакети акыркы эки жылдагы эң ири пакет болуп калды. Бул тууралуу ЕБ Кеңешинде билдиришкенин DW жазды.
Санкциялык тизмеге 120 адам жана уюм кошулду, ал эми жаңы «катуу көп деңгээлдүү санкциялар» согушту каржылаган Орусиянын экономикасынын негизги тармактарына багытталган.
Орусиянын «көмүскөдөгү флоту» тизмеси дагы 46 кеме менен толукталды. Жаңы пакет танкерлерди сатууда ишенимдүүлүктү текшерүү талаптарын киргизип, «көмүскөдөгү флоттун» кеңейишин татаалдаштырууну көздөйт. Мындан тышкары, ЕБ өлкөлөрүндө орусиялык муз жаргычтарга жана суюлтулган газ ташыган танкерлерге техникалык тейлөө көрсөтүүгө тыюу салынат, ал эми 2027-жылдан тарта Орусияга байланыштуу компанияларга СПГ-терминалдардын кызматтарын көрсөтүүгө да тыюу киргизилет.
ЕБ Кеңешинин билдирүүсүндө айтылгандай, Туапсе жана Мурманск порттору, 20 орусиялык банк жана үчүнчү өлкөлөрдөгү төрт каржы мекемеси транзакцияларга тыюу салынган тизмеге кирди. Ошондой эле криптоактивдер тармагында да чектөөлөр киргизилди — атап айтканда, Орусия тарабынан камсыздалган A7A5 стейблкоинине жана RUBx криптовалютасына каршы санкциялар киргизилди. Мындан сырткары, ЕБ европалык компанияларга санариптик рублди иштеп чыгууга көмөктөшүүгө тыюу салды.
Санкцияга Орусиянын аскердик-өнөр жай комплекси менен байланышкан 58 компания да кирди. Алардын арасында Кытайда, БАЭде, Өзбекстанда, Казакстанда жана Беларуста жайгашкан 16 уюм бар. Ошондой эле ЕБ Кыргызстанга сандык башкаруусу бар станокторду жана радио жабдууларды экспорттоого тыюу салды, анткени алар бул жерден көп учурда Орусияга кайра ташылып кетет.
