Колумбиялык жаран чапталган жасалма чач менен аэропортто кокаин алып өтүүгө аракет кылып, камакка алынган. Бул тууралуу Complex басылмасы жазды.
Колумбиянын Картахена эл аралык аэропортунда маңзатын чапталган чачтын астына катып алып өтүүгө аракет кылган 40 жаштагы киши Амстердамга учууну пландап жаткан. Полиция социалдык тармактарга жарыялаган кадрларда кызматкерлер кармалган адамдын чапталган чачын кесип, астынан оролгон 19 капсула кокаин таап жатканын көрүүгө болот. Баңгизаттын жалпы салмагы 220 граммдан ашкан, ал эми анын баасы 10 миң долларды түзөт.
Маалым болгондой, кармалган жаран баңги затын мыйзамсыз саткандыгы үчүн соттуулугу бар болчу. Камакка алынгандан кийин ал Колумбиянын Башкы прокуратурасына өткөрүп берилген. Ал жерде ага баңгизаттарын өндүрүү, сактоо жана аткезчилик менен байланышкан айыптар тагылат.
Картахена полициясынын башчысынын айтымында, 2024-жылы эле шаардын аэропортунда баңги аткезчилиги үчүн 45 адам кармалган. Кылмышкерлер көбүнчө мыйзамсыз заттарды багажга катып коюшат, атүгүл кээде жутушат. «Мен жарандарды, айрыкча ата-энелерди, сергек болууга жана трансулуттук кылмыштуу топтор эксплуатациялаган жаштарды көзөмөлдөөгө чакырам. Алар коопсуздук чараларын айланып өтүү оңой деп ишендирип, жаштарды алдап жатышат», — деген ал.
