Билим берүү жана илим министрлиги 2022-2023-окуу жылына карата ЖОЖдорго кабыл алууда талап жогору болгон кесиптер боюнча статистикалык маалыматтарды жарыялады.

2022-жылы жалпы республикалык тестирлөөгө 51 миң 183 абитуриент катышкан. Тестирлөөнүн катышуучуларынын упайларынын орточо көрсөткүчү 119,8 баллды түздү. Босого 110 же андан жогорку баллга тестирлөөнүн 29 миң 75 катышуучусу ээ болду, бул катышуучулардын жалпы санынын 57 пайызын түзөт. 2022-2023-окуу жылына 6000 мамлекеттик билим берүү бюджеттик орун бөлүнгөн.

Кадрларды даярдоонун педагогикалык багыттарына 1918 бюджеттик орун бөлүнгөн. 2022-2023-окуу жылында педагогикалык багытка 5138 студент кабыл алынган, бул 2021-жылга салыштырмалуу 22 пайызга көп (2021-жылы – 3984 студент).

Төмөндөгү кесиптер да жогорку суроо-талапка ээ болду:

IT адистиги боюнча — 3201 студент кабыл алынган;
Гуманитардык багыттарга (философия, саясат таануу, психология, журналистика, филология, лингвистика жана башка) 3116 студент кабыл алынды;
Экономикалык багыттары боюнча 2200 студент кабыл алынды;
Медициналык адистикти 1996 абитуриент тандаган;
Юридикалык багыттары боюнча 1442 студент кабыл алынган;
Курулуш жана архитектурага даярдоо багыттары боюнча 604 студент;
3000ден ашык студент айыл чарба, өнөр жай, тоо-кен, энергетика тармагында билим алууну чечкен.