AКИpress маалымат агенттигинин журналисти Арзыгүл Галымбетованын өлүмү боюнча кармалган блогер үй камагына чыкты. Бул тууралуу Баткен облустук сотунан билдиришти.
Маалыматка караганда, анын бөгөт чарасы кечээ, 18-августта каралып, үй камагына чыккан.
Кабарчынын өлүмү боюнча 28-мартта Баткен облустук милициясынан Кылмыш-жаза кодексинин 127-беренеси (этиятсыздыктан өлүмгө алып келүү) менен кылмыш иши козголгонун маалымдашып, анын алкагында Баткен шаарынын 33 жаштагы тургуну болгон “Батма-бат” Ютуб каналында иштеген блогер кармалганын билдиришкен. 29-мартта Баткен райондук сотунун токтому менен шектүү Батмакан Жолболдуева бир ай мөөнөткө камакка алынып, 26-апрелге дейре Жаза аткаруу кызматынын Жалал-Абад шаарындагы №53 мекемесине киргизилген.
