Кара-Кулжада болгон каргашалуу окуядан кийин Кыргызстан мусулмандарынын муфтийи Абдулазиз Закиров билдирүү таратты.
«Аялзаты – Аллах Тааланын жаратуудагы өзгөчө керемети. Анын жүрөгүнө боорукерликти, жүзүнө назиктикти, табиятына туруктуулукту бүткүл асыл сапаттары менен кошо берген. Ислам дини аялзатын кадырлап, урматтап, коргоп келген. Ар бир аял – эне, жар, кыз жана эже катары коомдун түпкү тиреги экенин унутпашыбыз керек. Пайгамбарыбыз Мухаммад «Силердин эң жакшыңар – аялдарына жакшы мамиле кылганыңар» деп, эркектерге аялзатына болгон мамиленин деңгээли менен ыйманын өлчөп берген. Аялзатынын укугу ыйык. Ага болгон кайдыгерлик – бул ыймандын алсыздыгы.
Аялга урмат – коомго урмат. Аялга камкордук – үй-бүлөгө тынчтык. Аялга мээрим – келечекке бейпилдик.
Ал эми Куранда Аллах Таала: «Аялдар – силердин кийимиңер, силер – алардын кийимиңер» деп, эркек менен аял бири-бирин жаап, коргоп, кооздоп туруучу түгөйлөр экенин баяндайт. Аялдын жан дүйнөсүнө тынчтык бербеген эркек – өзүн да тынчсыз кылат. Азыркы заманда аялзатына болгон зомбулук, көңүлкоштук, кордоо – бул жаратылыш мыйзамына, шариятка каршы келген чоң адилетсиздик. Аял – өзүнүн аземин, өзөгүн, өзүн – биз эркектер аркылуу бекем сезет. Эгер биз коргоо милдетибизди унутсак, анда биз эркек эмес, тек гана кара күч болуп калабыз. Аял – эне катары Жаннаттын эшигин ачат. Жар катары сенин бейишке болгон себепчиң. Кыз катары сенин жүрөгүңдүн назик күзгүсү. Аларды урматтоо – ибадат. Аларды тебелөө – пастык. Хадисте «Эненин таман алдында бейиш бар» деп айтылгандай, пайгамбарыбыз бейишке алып баруучу жол аялзаты аркылуу болорун ачык айткан», — деп жазган ал.
