“Тагдыр” көрсөтүүбүздүн бул жолку каарманы 29 жаштагы Айзат Маматназар кызы. Ал турмуштун сыноосуна кабылып, учурда жардамга муктаж болуп жатканын айтат. Каарманыбыз кичине кезинен апасынан айрылып, 5-классты аяктаган соң Орусияда бала багуучу болуп иштөөгө мажбур болгон. Кыргызстанга кайтып келгенде атасынын үйлөнүп алганын билген. Үйгө батпаган кыз кафеде иштеп, өз жанын өзү багып жүргөндө, ала качып кеткен. 20 жашында турмушка чыгып, 5-6 жылдай жашап, кайненесинин кийлигишүүсүнөн улам түгөйлөр эки жолго түшүшкөн.
«Ал мага ичип келип кол көтөрө баштады. Бирок мен чыдадым. Мени ким батырмак эле. 1,5 жылдан соң боюма бүттү. Боюмдагы балам менен талаага чыгып, иштеп жүрдүм. Оор жумушта иштеп жүрүп, кызымды 7 айында төрөдүм. Кайын журт биздин жашоого кийлигише баштады. «Сага эч ким жардам бербейт. Элдин туугандары мал энчилешет, сага эмне энчилешти?» деп башташты. «Башкалардын кайын журту күйөө баласына унаа, үй алып беришет экен. А сенин үй-бүлөң кыйратып сеп берген жок» деди. Менин апам кичинемде каза болуп калган, сеп даярдоого мүмкүнчүлүк жок болчу», — дейт келин.
