Кыргыз-тажик чек арасында орун алган жаңжалдан улам кылмыш иши козголду. Бул тууралуу Башкы прокуратуранын басма сөз кызматынан кабарлашты.
«Тажикстандын аскер кызматкерлеринин иш-аракеттери эл аралык келишимдерди бузуу менен мамлекеттин бүтүндүгүнө каршы алдын ала пландаштырылган чагымчылдык катары бааланат. 29-апрелде бул факты Кыргыз Республикасынын Кылмыш-жаза кодексинин 380-беренеси («тынчтыкка каршы кылмыш») менен реестрге Башкы прокуратура тарабынан катталган. Сотко чейинки өндүрүш иши УКМК, Ички иштер министрлиги жана Аскер прокуратурасынын кызматкерлеринин арасынан ведомстволор аралык тергөө тобуна тапшырылды», — деп жазылат билдирүүдө.
Кыргыз өлкөсү менен Тажикстандын чек арасындагы абал 29-апрель күнү таңга маал курчуп кеткен. Акыркы маалыматтар боюнча, кагылышуудан кыргыз тараптан 134 адам жабыркап, анын 13ү каза тапты, алардын бири 12 жаштагы кыз экени кабарланды.
Буга чейин эки өлкөнүн тышкы иштер министрлери саат 20:00дөн баштап ок атышпоо чечимин кабыл алгандыгы кабарланган.
